यस्तो होस जीवन साथी

मेरो मन माझ फुलोस यस्तो होस जीवन साथी
साथमा मेरो संसार भुलोस यस्तो होस जीवन साथी

दुनियाँ यो हेर्छ छुट्टै नजरले हर मान्छेलाई
मेरो सामु सधैं खुलोस यस्तो होस जीवन साथी

उज्यालो हुन धरतीमा घाम मुस्काउनै पर्छ
ओठमा सधैं हाँसो झुलोस यस्तो होस जीवन साथी

आवरणमा मात्र त के नै पढ्न पाइन्छ र
मेरो अन्तरंग डुलोस यस्तो होस जीवन साथी

म उसलाई आफ्नो मनमा सधैं गर्व गरिरहुँ
थोपाथोपा रगतमा घुलोस यस्तो होस जीवन साथी

गजल

शहरमा मन काट्ने धार देखेँ
बरु पाखे भनिने मन उदार देखेँ

जति शिक्षित भएँ भन्छ यो शहर
संस्कृतीमाथी उति नै प्रहार देखेँ

शहरका गगनचुम्बी महल रिझाएर
गाउँमा दमन गर्ने सरकार देखेँ

मन भित्र पापको झोली बोकेर
निधारमा ॐकार मुहार देखेँ

केही समयको यो शहर बसाइमा
शहरिया जीवनको स्वार्थी सार देखेँ